（十四） 中學 - 又係搭𨋢（升降機）
我真係好驚搭𨋢，之前都同巴絲分享過我搭𨋢一定側身入嘅習慣，今次再講搭𨋢。 中學嘅我真係成日掛住玩，唔願返屋企，有日放左學上同學油麻地屋企打機，佢地上曬去先，我後join，自己搭𨋢上去。
佢住15樓。
𨋢嘅樓層係
G，3，5，7，9，11，13，15，17。
我如常咁入𨋢，噤15字樓。
對門關上，突然，彈返開。
之後有個伯伯走左入黎，企響噤𨋢個位到，無嘢啦，佢噤9樓，𨋢門再次關上。
我埃住𨋢嘅角落位，果刻望望個阿伯，仲心諗，駛唔駛咁趕呀呀伯。不過呢個阿伯幾有型，立曬頭，背脊望佢，佢件衫黑色帶d紅色花咁，幾搶眼。
叮一聲，9樓𨋢門打開，阿伯出𨋢，然後門關上。
咁架𨋢就繼續上喇。
「叮」。
11樓，𨋢停左，一打開門，頭先個阿伯企左響到，行入𨋢！ 我當堂呆左，唔識反應，架𨋢由9樓上到11樓，我諗都唔駛5秒，阿伯點可能9樓出，即時11樓入返黎？
而佢，真係入返黎。
我即刻淆喇。背靠住𨋢後面有咁貼得咁貼。
阿伯同頭先一樣，都係企返響噤𨋢個位置，都係噤9樓。
我心諗…
我一陣出𨋢咪要經過佢？
阿伯一直望住前邊d 𨋢制。我一直望住地下自己對腳。
快d啦快d啦快d啦！
快d到啦，我決定當𨋢門一開，即刻急步就跑。
雖然係短短幾層，但呢程𨋢，我好似搭左好耐好耐咁…
「叮」。
𨋢門打開。
我講左句「唔該借借」，急步就行。
出𨋢轉左第三間，「叮噹!叮噹!」我快手噤響門鐘。
呃…
仆得街，叮咩噹，我個同學嘅門鐘聲都唔係咁嘅聲，一睇，13樓…
我出左13樓。
我唯有選擇，行多兩層樓梯…
我步步為營咁推開兩條防煙門，佢呢道d後樓梯好窄，好暗，闊度大概唔夠一個人張開兩隻手咁闊。
我一步一步行上去。
我個心跳得好快，我真係好驚，好驚…個腦仲不停洐生d恐怖嘢，好驚如果個阿伯係樓上行返落黎我點算…好驚如果呢刻擰轉頭見到佢響後面點算…
快步標上兩層，到達15樓，推門直出。狂噤門鐘，狂拍鐵閘，入屋，好彩無事。
同學仲勁笑我做乜面青青慌室室咁，我坐左好耐，飲左好幾杯水，先粗略同佢地講到。
之後屋主講返，先至知，原來11樓，上星期有個伯伯響單位裡面突然休克暈倒，被發現嘅時候已經送院不治。呢排都聽聞有街坊話見到個伯伯響11樓走廊到徘徊，好似入唔到屋咁，又有人見過佢企響密碼閘出面等。
伯伯可能根本就唔知…自己已經走左。
我地成班同學聽完，即刻狂鬧屋主同學： 「頂！明知呢d時候仲叫我地上黎打機！」
佢答：「就係明知呢d時候…先至叫你地上黎打機之嘛…你估我唔驚架！」
唔…都岩嘅…
果晚，我地好早就散band走人。
順帶一提，果時嘅我真係唔知，當日伯伯著住果件…搶眼黑色帶紅嘅衫，我大個左先至知道，
原來…
叫壽衣。
#離奇 #鬼故 #鬼 #靈異 #不可思議 #高登 #靈異事件勿語 #離奇家遮 #isee #ghost #horror #scary #852 #hkig #hongkong #style #writer #donotsayhello
Search